запісаў: 1067, дакументаў: 12617

Дакументальная кніга “Аршанская хроніка 1986-2001”

Дата публікацыі: 19 ліпеня 2017

Дакументальную кнігу “Аршанская хроніка 1986-2001” , прэзентаваў 18-га ліпеня ў Оршы яе аўтар-укладальнік Віктар Андрэеў. Кніга ў актуальным жанры нон-фікшн мае 251 старонку і заснаваная на архіўных матэрыялах, дакументах ды інтэрв’ю з 15 асобамі.  Віктар Андрэеў распавёў як прыйшла ідэя напісання дакументальнай кнігі пра Оршу: “Я ведаў шмат людзей, якія ў сваім жыцці шмат зрабілі для Оршы. І шмат хто пра гэта не ведае альбо забыў. Ідэя была ў тым, каб сабраць у кнізе падзеі ды людзей, якія выяўлялі грамадзянскую актыўнасць і ўплывалі на жыццё ў горадзе Орша. Напрыклад, Алесь Сярожкін, дзякуючы яму, у Оршы захаваўся касцёл і будынак Куцеінскага манастыра. Мне хацелася, каб гэта інфармацыя не была страчаная. У гісторыі застаюцца “генералы”, людзі, якія займалі высокія пасады. А мне хацелася запісаць гісторыі людзей, якія ў невялікім горадзе здзяйснялі вялікія справы. Я імкнуўся перадаць у кнізе атмасферу часу, калі адны людзі змагаліся за выжыванне, а іншыя за тое, каб змянілася сацыяльна-палітычная сітуацыя ў горадзе. Такія людзі, як Алена (Тананана) Сцяпанава і Віктар Сцяпанаў, якія запрашалі людзей на першыя ў горадзе курсы беларускай мовы. Алена Сцяпанава і Віктар Сцяпанаў запрашалі людзей на першую сустрэчу насельніцтва з Беларускім Народным Фронтам на селікатным заводзе. Тады маглі гэта рабіць і рабілі. Збор матэрыялу заняў каля году. Калі перакрочваеш лічбу ў 60 гадоў, прыходзіць думка, што ў любы момант можна не паспець. Такіх кніг павінна быць напісана шмат, такія кнігі павінны з’яўляцца ў кожным горадзе”.