ГРАМАДСКІ ВЭБ-АРХІЎ “ВЫТОКІ”
Мы ўзышлi не з насення, што ветрам занесена,
Мы не дзiкай травы самарослыя парасткi.
У глыбiнях зямлi, гераiчнай i песеннай,
Нашых душ каранi — з вузялкамi ўпартасцi.
Ніл Гілевіч
ВЫТОКІ СВАБОДЫ
Наш беларускі шлях да свабоды пачаўся вякі таму. Па ім ішлі ваяры Грунвальда і Воршы, касінеры Касцюшкі і партызаны Каліноўскага, жаўнеры Слуцкіх палкоў… І сёння мы ў рушанні – крок за крокам, дасягаючы вольнасці, пра якую марылі, за якую гінулі яны.
Кожнае вольнае слова, кожнае здабытае права, кожная адноўленая справядлівасць, кожны вызвалены палітвязень – гэта адваяваны крок на шляху да свабоднай дэмакратычнай Беларусі. Каб не збочыць, не згубіць кірунку, варта памятаць пра вытокі, не забывацца пра тых, хто пракладаў маршрут. Будучыня – у руках тых, хто валодае мінулым.
Наша гісторыя не сканчаецца. Будучыня будзе нашая!
Наш сайт – спроба захаваць, выратаваць ад цемры ды ілжы найноўшую гісторыю нашай свабоды – гісторыю разьвіцця грамадзянскай супольнасці і вызвольнага руху апошніх дзесяцігодздзяў савецкага рэжыму, а таксама рэжыму, які ўсталяваўся ў Беларусі пасля прэзыдэнцкіх выбараў 1994 году.
Грамадскі віртуальны архіў “Вытокі” – супольная ініцыятыва “Вясны”, “Дыярыуша”, “Асамблеі” і “Супольнасьці”. Нашыя мэты:
- Захаваць у электронным фармаце ўсе даступныя для збіральнікаў крыніцы па гісторыі станаўлення грамадзянскай супольнасці, грамадскіх і вызвольных рухаў у Беларусі.
- Сыстэматызаваць і апрацаваць гэтыя матэрыялы.
- Зрабіць гэтыя матэрыялы агульнадаступнымі ў выглядзе адкрытай для карыстальнікаў вэб-старонкі.
Гэтая справа будзе паспяховаю толькі праз агульныя намаганні. Таму заклікаем грамадскія арганізацыі і ініцыятывы, усіх, хто мае чым дапамагчы, – прыняць удзел у стварэнні архіву, у захаванні нашых вытокаў.
