З 22 снежня 2015 года па 1 студзень 2016 года ў Менску на Траецкім прадмесці ў кнігарне “Галіяфы” адбывалася фотавыстава, прывечаная 30-годдзю легендарнага моладзевага аб’яднання “Талака”. На выставе былі  прадстаўленыя 100 фотаздымкаў з найноўшай гісторыі Беларусі з архіву фатографа Уладзіміра Сапагова.

 

Лёс фатографа драматычны. Уладзімір Сапагоў (04.07.1952-11.10.2012) нарадзіўся ў Берасцейскай вобласці, выхоўваўся ў дзіцячым доме, вучыўся ў Маскве. Працаваў: на БАМе, на кінастудыі “Беларусьфільм”, на Трактарным заводзе. У 80-ыя гады ХХ-га стагоддзя далучыўся да Адраджэнскага руху. У 1998-2000 супрацоўнічаў з праваабарончым выданнем “Права на Волю”. Уладзімір Сапагоў ніколі не развітваўся з фотаапаратам, жыў у інтэрнаце Трактарнага заводу, быў самотным чалавекам. У апошнія дні жыцця фатографа ў інтэрнаце рабілі рамонт, і адразу пасля смерці Уладзіміра Сапагова арыгіналы фотаздымкаў выкінулі на сметнік. Але яго сябар Міхаіл Мякіш здолеў уратаваць негатывы і пазітывы, якія аддала камэндантка інтэрнату. Уладзімір Сапагоў пахаваны сябрамі ў вёсцы Весніна Лагойскага раёну.

У 1985 годзе ў СССР пачаліся рэформы, якія атрымлі назву «перабудова», якой папярэднічалі «новае мысленне» і «паскарэнне». У 1985 – 1986 гадах ў Менску былі створаныz арганізацыі – Клуб імя Уладзіміра Караткевіча (1985-1986) і клуб „Талака” (1985-1989). У снежні 1986 было заснаванае Таварыства маладых літаратараў „Тутэйшыя”. Увосень 1988 года культурна-асветніцкія суполкі зліліся ў палітычнае рух – Беларускі Народны Фронт. З усіх моладзевых арганізацый 80-ы- гадоў не змяняючы мэтаў і задач «дажыла» да нашага часу адна арганізацыя – Гомельская моладзевая краязнаўчая грамадская арганізацыя „Талака”.

Выставу арганізаваў “Цэнтр даследванняў грамадзянскай супольнасці”