20 студзеня, пасля цяжкай хваробы на 86-м годзе жыцця памёр выдатны беларускі гісторык, доктар гістарычных навук, прафесар Анатоль Грыцкевіч.
Ён нарадзіўся 31 студзеня 1929 у Мінску. У 1950 скончыў Мінскі медыцынскі інстытут, у 1955 — Мінскі інстытут замежных моваў, а ў 1958 — БДУ, нейкі час працаваў доктарам. З 1959 — у Інстытуце гісторыі АН Беларусі, з 1975 — загадчык кафедры Мінскага інстытута культуры. Даследаваў гісторыю Беларусі перыяду феадалізму, гістарыяграфію, рэлігійныя праблемы ў ВКЛ, становішча праваслаўнай, уніяцкай царквы, гісторыю беларускай шляхты, гісторыю Беларусі 1917—1920. Аўтар шматлікіх артыкулаў і манаграфій.
Анатоль Грыцкевіч быў актыўным у грамадскім жыцці, пэўны час быў сябрам сойму БНФ, старшынём Згуртавання беларускай шляхты. У 2001—2005 гг. быў прэзідэнтам МГА Згуртаванне беларусаў свету «Бацькаўшчына», пасля ганаровым старшынём «Бацькаўшчыны».