Мерапрыемства праводзілася 18 верасня Асамблеяй НДА з мэтай сфармуляваць пазіцыю арганізацыі, пазначыць місію незалежнай грамадскасці Беларусі ў небяспечную для самой будучыні краіны пару.
На круглым стале выступілі мовазнаўцы і грамадскія дзеячы Вінцук Вячорка, Пётра Садоўскі і Алена Анісім, Вацлаў Арэшка, праваабаронца Алесь Бяляцкі. На тэму адукацыі і фармавання каштоўнасцяў пакалення прамаўляла Тамара Мацкевіч. Валер Булгакаў прааналізаваў вынікі дзейнасці культурных НДА. Ірына Лаўроўская зачытала даклад аб беларускай ідэнтычнасці і ўрбаністычным ландшафце. Алег Хаменка засяродзіўся на каштоўнасным падыходзе да праблем аховы нацыянальнай бяспекі.
Як адзначылі арганізатары, у дзейнасці беларускіх НДА выразна ўмацаваўся кірунак абароны беларускай ідэі, ідэнтычнасці, чаго нельга сказаць аб дзейнасці афіцыйных уладаў.
Прысутныя прадстаўнікі рабочай групы Асамблеі НДА, грамадскія дзеячы адзначылі, што спадзявацца на дапамогу дзяржавы ў абароне беларускай незалежнасці не даводзіцца. Толькі заснаваныя на дэмакратычных і нацыянальных каштоўнасцях валанцёрскія ініцыятывы ў крызісны момант здольныя ўзяць на сябе адказнасць і выратаваць сітуацыю.
Таму прысутныя заклікалі ўсе грамадскія арганізацыі і ініцыятывы, вызначыць на бліжэйшыя гады супольную місію: «Барані сваё!».
Старшыня Рабочай групы Асамблеі НДА Сяргей Мацкевіч заявіў: «Асамблея НДА заклікае ўсіх актывістаў беларускай грамадзянскай супольнасці засведчыць агульную місію «Барані сваё», пашырыць сваю работу ў адпаведнасці з ёй, каб зберагчы незалежнасць і аднавіць свабоду краіны».
Удзельнікі круглага стала прынялі супольны Зварот пра місію грамадзянскай супольнасці.

Місія беларускай грамадзянскай супольнасьці –
адстаяць цывілізацыйны выбар і будучыню Беларусі

Сёньня краіна Беларусь і беларускае грамадзтва стаяць напярэдадні самых небясьпечных за ўсе гады незалежнасьці выпрабаваньняў. Геапалітычная сытуацыя – адраджэньне агрэсіўных імпэрскіх амбіцыяў усходняга суседа пад лёзунгам аднаўленьня так званага “Русского мира” – ставіць пытаньне пра далейшы лёс Беларусі як незалежнай дзяржавы, пра цывілізацыйны выбар і само далейшае існаваньне беларускага народу. Між тым у выніку апошніх двух дзесяцігодзьдзяў мэтадычнага разбурэньня ўладамі беларускай самасьвядомасьці ды нацыянальнай ідэнтычнасьці наш народ страчвае патэнцыял самаабароны ад паглынаньня адноўленай недэмакратычнай Расейскай імпэрыяй.

Спадзявацца на тое, што цяперашняя дзяржаўная ўлада ўратуе беларускую незалежнасьць, — беспадстаўна. Як паказвае досьвед Украіны, гарантам незалежнасьці і будучыні дзяржавы можа быць толькі адказнае свабоднае грамадзтва, структураванае ў грамадзянскую супольнасьць. Надзвычайную ролю ў забесьпячэньні пэрспэктывы народу адыгрывае яго цывілізацыйна-культурная тоеснасьць. Менавіта ўгрунтаваныя на дэмакратычных і нацыянальных каштоўнасьцях ініцыятывы, а не дзяржаўныя інстытуцыі, у крызысны момант здольныя ўзяць на сябе адказнасьць і ўратаваць сытуацыю.

Мы лічым неабходным і неадкладным для грамадзянскай супольнасьці Беларусі, для ўсіх грамадзкіх арганізацыяў ды ініцыятываў (як згуртаваных у Асамблеі дэмакратычных няўрадавых арганізацыяў, так і іншых), для згуртаваньняў творцаў вызначыць на бліжэйшыя гады супольную місію, са зьдзяйсьненьнем якой сувымяралася б выкананьне сваёй канкрэтнай задачы.

Мы фармулюем гэтую місію двума словамі: БАРАНІ СВАЁ.

Яна раскрываецца:
– у неабходнасьці абараняць нацыянальна-культурную ідэнтычнасьць (мову, культуру, гістарычную памяць) беларускага народу і пачуцьцё гістарычнай прыналежнасьці беларусаў ды іншых нацыянальных групаў, што жывуць у Беларусі, да эўрапейскага культурна-цывілізацыйнага абшару;
– у прыняцьці на сябе адказнасьці за самаарганізацыю беларускага грамадзтва на ўзроўні мясцовых супольнасьцяў, прафэсійных групаў, групаў інтарэсаў;
– у скаардынаванай экспэртнай, інфармацыйнай ды адукацыйнай працы, скіраванай на падвышэньне адказнасьці кожнага грамадзяніна і кожнай грамады за сваю зямлю і сваю краіну, за лёс беларусаў як унікальнага народу і Беларусі як незалежнай дзяржавы, на ўмацаваньне эканамічных, сацыяльных, міжнародна-праўных падставаў дзяржаўнай незалежнасьці Беларусі як дэмакратычнай дзяржавы.
Заклікаем усіх адказных актывістаў беларускай грамадзянскай супольнасьці – разам ці паасобку – засьведчыць гэтую супольную місію, пашырыць сваю працу ў адпаведнасьці зь ёю і тым даць шанец нашай краіне выйсьці зь цяжкіх непазьбежных выпрабаваньняў годна, зьберагчы незалежнасьць і аднавіць свабоду.