Падзеі, якія разгортваюцца ў гэтыя дні ва Ўкраіне, сведчаць аб пачатку грамадзянскай вайны. Прычыны, якія правакуюць гэтую вайну, знаходзяцца па-за Ўкраінай. Улічваючы разбуральную моц сучасных відаў узбраення, у тым ліку ядзернага, далейшая эскалацыя гэтага канфлікту можа прывесці  да самых небяспечных наступстваў не толькі ў Еўропе, але і ва ўсім свеце. 

У сувязі з гэтым Рада Беларускай Інтэлігенцыі  лічыць неабходным заявіць наступнае:

Сапраўднай прычынай, якая справакавала хвалю антыўкраінскіх бунтаў у Крыму і ва ўсходніх рэгіёнах Украіны, з’яўляюцца імперскія памкненні расійскага кіраўніцтва. Рыторыка, якой апраўдваюцца правакацыйныя дзеянні, грунтуецца  на сцвярджэннях аб “прыцісненні” рускамоўнага насельніцтва, і не адпавядае рэчаіснасці. Палітыка русіфікацыі, скіраваная на знішчэнне нацыянальных моў, нацыянальнай тоеснасці, культуры, гістарычнай памяці народаў, якія ўваходзілі ў склад Расійскай імперыі, актыўна выкарыстоўвалася  яшчэ ў царскай Расіі. У гады існавання СССР яна працягвалася пад лозунгам “стварэння новай гістарычнай фармацыі  — “савецкага чалавека”. Менавіта такія “савецкія” людзі, пазбаўленыя гістарычнай памяці, выхаваныя ў пагардзе да роднай мовы, з’яўляюцца сёння прыдатным матар’ялам для імперскай прапаганды не толькі ва Ўкраіне. Сёння ў краінах былога СССР падтрымка і абарона патрэбныя не расійскай, а нацыянальным мовам. Гэтая праблема добра вядомая і ў Беларусі, дзе сучасныя манкурты на дзяржаўных пасадах працягваюць вынішчэнне беларускай мовы. Відавочна, што з такой сітуацыяй нельга мірыцца. Нацыянальным мовам у незалежных  краінах, якія ўтварыліся пасля распаду СССР,  павінен быць вернуты адпаведны статус. Трактаваць гэта як “уціск рускамоўнага насельніцтва” — несумленна і амаральна. Падобнымі  метадамі кіравалася ў свой час гебельсаўская прапаганда, разлічаная, як вядома, не на інтэлектуальныя эліты, а, па прызнанні яе стваральнікаў, “на апошняга падонка ў краіне”.

Ужыванне амаральных прапагандысцкіх метадаў, уласцівых гітлерызму і сталінізму, ніколі не дасць жаданых вынікаў. Доказам гэтаму можа служыць і лёс фашысцкай Германіі, дзе напачатку народ, ачмураны прапагандай, у эйфарыі вітаў захопніцкія авантуры фашысцкага правадыра.

Мы патрабуем ад расійскага кіраўніцтва спыніць спробы захопу украінскіх тэрыторый.

Мы заклікаем нашых калегаў — прадстаўнікоў інтэлігенцыі  Расіі, якія захавалі ясны розум і сумленне, выкарыстаць усе свае сілы і магчымасці, каб давесці да народаў Расіі ўсведамленне небяспекі, якую нясуць імперскія авантуры крамлеўскага кіраўніцтва.

Мы выказваем нашу салідарнасць з народам Украіны і заклікаем усіх сумленных людзей у свеце падтрымаць Украіну ў абароне яе незалежнасці і тэрытарыяльнай цэласнасці.

 

Прынята на паседжанні Рады беларускай інтэлігенцыі

17 красавіка 2014г.