Спачатку аднавіць непарушнасць ахоўнай зоны Курапатаў

 Да такой высновы прыйшлі ўдзельнікі нарады экспертаў па сітуацыі вакол Курапатаў, што адбылася ў Мінску 16 красавіка напярэдадні грамадскага абмеркаванняя праекту даталёвага планавання (ПДП) забудовы тэрыторыі з захаду ад народнага мемарыялу. Грамадскае абмеркаванне прызначана на 17 красавіка а 15.00 у Доме культуры аграгарадку Лясны (Мінскі раён).

 У экспертаў выклікала пытанні тэма дэталёвага планавання тэрыторыі менавіта каля заходняй мяжы Курапатаў. Рэч у тым, што грамадскасці прапануюць абмеркаваць праект гэтай забудовы, калі ён ужо часткова здзейснены. Сумеснае таварыства з абмежаванай адказнасцю “БелРэстІнвест” ужо пабудавала на 51-м кіламетры МКАД каля Курапатаў аб’ект прыдарожнага сервісу з першапачатковай назваю “Бульбаш-хол”. Пры гэтым “БелРэстІнвест” парушыў заканадаўства, бо ўзвёў 4 (чатыры) дамкі ў ахоўнай зоне Курапатаў. вызначанай часовай схемай зонаў аховы гэтай гісторыка-культурнай каштоўнасці згодна пастанове Міністэрства культуры ад 12 мая 2004 года. 

 Каб выправіць гэтае парушэнне, неабходна выканаць прадпісанне Генеральнай пракуратуры Мінскаму аблвыканкаму ад 27 лістапада 2012 году аб вынасе “БелРэстІнвестам” 4-х дамкоў аб’екту прыдарожнага сервісу з тэрыторыі ахоўнай зоны Курапатаў.

 Грамадскасць патрабуе, каб Міністэрства культуры надала дзеючай часовай схеме зонаў аховы Курапатаў статус канчатковага праекта зонаў аховы гэтай каштоўнасці. Адсутнасць такога нарматыўна-прававога акта ўжо прывяла і надалей прывядзе да перманентнага парушэння заканадаўства пры распрацоўцы ПДП забудовы тэрыторыі вакол Курапатаў.

 І трэцяе, бадай, галоўнае патрабаванне грамадскасці. Да выпраўлення гэтага сур’ёзнага парушэння заканадаўства Рэспублікі Беларусь, да паўнацэннага зацверджання канчатковага праекту зонаў аховы Курапатаў усе дзеянні, звязаныя з праектаваннем і пагатоў забудоваю тэрыторыяў вакол каштоўнасці павінны быць спыненыя.

 Апроч таго, эксперты звярнулі ўвагу на тое, што ПДП забудовы тэрыторыі каля Курапатаў утрымлівае элементы мемарыялізацыі (мемарыяльны парк “Курапаты” і мастацкі вобраз “Недабудаванага Храму”).

 Грамадскасць нагадвае, што, па-першае, народны мемарыял у Курапатах ужо створаны намаганнямі грамадзянаў. Па-другое, 25 сакавіка 2002 года 14 грамадскіх аб’яднанняў Беларусі ўхвалілі “Канцэпцыю мемарыяла ахвяраў палітычных рэпрэсій “Курапаты”, што акрэслівае ўмовы далейшай працы па ўшанаванню ва ўрочышчы памяці бязвінных ахвяраў сталінізму. Гэтая канцэпцыя разам з прапановай стварыць Рэспубліканскую камісію па мемарыялізацыі Курапатаў з удзелам грамадскасці была накіравана прэм’ер-міністру краіны Генадзю Навцікаму. Эксперты лічаць, што лепшы праект мемарыялізацыі Курапатаў павінен быць вызначаны ў выніку адкрытага конкурсу і  агульнанацыянальнага абмеркавання ўсіх прапаноў, што паступілі на разгляд Рэспубліканскай камісіі.

 Марат Гаравы.