Нацыянальнае свята шанавання памяці венгерскага народа, паўсталага супраць камунізму і панавання СССР.
У 1956 у Венгрыі пачаліся хваляванні насельніцтва , незадаволенага палітычнымі рэпрэсіямі і неэфектыўнай эканамічнай палітыкай камуністычнага прасавецкага кіраўніцтва. Незадаволенасць па ініцыятыве студэнтаў Будапешцкага політэхнічнага інстытута 23 кастрычніка 1956 вылілася ў масавую дэманстрацыю на вуліцах Будапешта. На працягу дня ў дэманстрацыі прыняло ўдзел больш за 200 тысяч чалавек. Венгры патрабавалі вываду савецкіх войскаў з краіны, стварэння новага ўрада на чале з прэм’ер-міністрам Імрэ Надзем. Таксама народ патрабаваў ўвядзення афіцыйнага пражытачнага мінімуму для рабочых, дэмакратычнай працэдуры выбараў і дазволу шматпартыйнасці. 24 кастрычніка Імрэ Надзь зноў стаў прэм’ер-міністрам Венгерскай Народнай Рэспублікі, а 1 лістапада абвясціў аб выхадзе дзяржавы з Варшаўскай дамовы і абвясціў нейтралітэт Венгрыі. У адказ на гэта 4 лістапада ў краіну ўварваліся савецкія войскі. Венгрыя прасіла ў ААН дапамогі супраць савецкай інтэрвенцыі, але атрымала толькі маральную падтрымку. Да 9 лістапада, вугорская рэвалюцыя была крывава падаўленая савецкай арміяй. Імрэ Надзь, многія іншыя кіраўнікі і сотні удзельнікаў паўстання былі растраляныя. Тысячы былі кінутыя ў турмы. Вымушана эмігравалі з краіны больш за 200 тысяч чалавек. Савецкія войскі заставаліся ў Венгрыі да 1991.