Пра гэта паведаміў ініцыятар правядзення талакі, былы вязень ГУЛАГу, актывіст грамадскай ініцыятывы «За ўратаванне мемарыяла Курапаты» Уладзімір Раманоўскі.
Паводле ягоных слоў, з пачатку талакі (25 траўня) яе ўдзельнікі на добраахвотнай аснове прыбралі ад смецця, хмызняка і сухастою каля 0,25 гектара тэрыторыі ўрочышча.
«Да завяршэння талакі (30 кастрычніка) валанцёры ачысцяць яшчэ нейкую частку народнага мемарыяла. Аднак добраўпарадкаваць усё ўрочышча плошчай каля 30 га можа толькі дзаржава, бо патрэбны вялікія грошы (каля 1 мільёна даляраў ЗША), каб фінансаваць працы па прыборцы гэтай тэрыторыі ад смецця, хмызняку і сухастою, іх вывазу і перапрацоўцы», — сказаў Раманоўскі.

Каардынатар ініцыятывы Ганна Шапуцька адзначыла, што талака праводзіцца на паўночна-заходнім ускрайку ўрочышча. «Мы ніколі не чакалі, што менавіта тут, насупраць пляцу, дзе ўзводзіцца рэстаранна-забаўляльны комплекс «Бульбаш-хол», Курапаты знаходзяцца ў такім занядбаным стане. Шокам для нас сталі гурбы асфальта, будаўнічых матэрыялаў, бытавых адкідаў і бітага шкла ад пікнікоў і несанкцыянаванага вывазу смецця. І каб ачысціць толькі гэты бок ўрочышча, патрэбны вялізарныя высілкі», — сказала Шапуцька. Яна запрасіла жыхароў Мінска да ўдзелу ў талацэ па добраўпарадкаванню нацыянальнага некропалю.
Былы вязень ГУЛАГу Сяргей Ханжанкоў лічыць, што талака павінна ператварыць Курапаты ў мемарыял еўрапейскага значэння.
«Справа ў тым, што цэнтральная частка ўрочышча ўвесь час знаходзіцца пад наглядам грамадскасці. Аднак астатняя частка Курапатаў вельмі занядбаная. Удзельнікі талакі сведчаць пра гэта і заклікаюць беларусаў, неабыякавых да сваёй трагічнай мінуўшчыны, прыйсці ў народны мемарыял, каб нам не было сорамна перад нашымі дзецьмі і ўнукамі. Перш за ўсё трэба прыбраць Курапаты так, каб можна было падыйсці да любой з больш за 500 западзін — мяркуемых пахаванняў. Пакуль жа гэта зрабіць немагчыма», — падкрэсліў Сяргей Ханжанкоў.
Дарэчы, днямі актывісты КХП-БНФ каля ахоўных памежных знакаў гісторыка-культурнай каштоўнасці міжнароднага значэння «Месца згубы ахвяраў палітычных рэпрэсій 1930-1940-х гадоў ва ўрочышчы Курапаты» ўсталявалі металічныя чатырохканцовыя крыжы вышынёю каля пяці метраў.
Нагадаем, што шматдзённая талака ў Курапатах пройдзе ў тры этапы. Першы этап, прысвечаны 25-м угодкам публікацыі артыкула «Курапаты — дарога смерці» Зянона Пазьняка і Яўгена Шмыгалева ў штотыднёвіку «Літаратура і мастацтва» ад 3 чэрвеня 1988 года, праводзіўся штодзень з 27 па 31 траўня і 1 чэрвеня.
Другі этап талакі, прысвечаны Еўрапейскаму дню памяці ахвяраў сталінізму і нацызму (23 жніўня), пройдзе з 15 па 22 жніўня, а трэці этап, прысвечаны Дню памяці ахвяраў палітычных рэпрэсій у Беларусі (29 кастрычніка), — з 21па 28 кастрычніка. Між этапамі талака адбываецца раз на тыдзень па аўторках (пачатак а 17.00).

Марат Гаравы «Новы Час»