Дарагія суайчыньнікі!
Неўзабаве, 19 кастрычніка сёлета, спаўняецца чвэрць стагодзьдзя ад моманту, калі на гістарычным паседжаньні ў будынку касьцёла Сьв. Сымона і Алены (тагачаснага Дому кіно) на прапанову Зянона Пазьняка, падтрыманую Васілём Быкавым, быў утвораны Арганізацыйны камітэт Беларускага Народнага Фронту за перабудову “Адраджэньне”, гонар працаваць у складзе якога выпаў і на нашую долю.
Ужо ў першай сваёй заяве Аргкамітэт выступіў за “перабудову грамадзтва на прынцыпах дэмакратыі і гуманізму”, за “сувэрэнітэт Беларусі”, за “падпарадкаваньне эканомікі інтарэсам чалавека”, за “сацыяльную справядлівасьць”, за “прававую дзяржаву”, за “экалягічна чыстую Беларусь”, за “адраджэньне і дзяржаўнасьць беларускай мовы”. А ў першай Праграме была абвешчаная галоўная мэта БНФ – “свабодны чалавек у адроджанай незалежнай Беларусі”. Бо ня можа захаваць незалежнасьць несвабодны народ.
Дзякуючы актыўнасьці жывога беларускага грамадзтва, намаганьням тых фронтаўцаў, якія былі дэпутатамі Вярхоўнага Савету Беларусі 12-га скліканьня і мясцовых саветаў, і тых, што ў розных гарадах ачолілі барацьбу народу за будучыню сваёй краіны, беларусам удалося вырашыць галоўную гістарычную задачу – 25 жніўня 1991 года заканадаўча замацаваць незалежнасьць Беларусі й дамагчыся яе міжнароднага прызнаньня.
Інтэлектуальны патэнцыял сяброў БНФ, іх актыўная і самаахвярная праца дапамаглі нашай краіне, асабліва ў пачатку 90-х гадоў, пачаць увасабленьне ідэяў і праграмных мэтаў Беларускага Народнага Фронту. Менавіта Беларускі Народны Фронт на пачатку 90-х гадоў заклаў падмурак дэмакратычнай шматпартыйнасьці і парлямэнтарызму ў Беларусі. А гераічная Вясна 1996 году прадэманстравала нашую рашучасьць і волю ў абароне Незалежнасьці і Свабоды ад замахаў антыбеларускіх сілаў.
На жаль, далейшае ўнутрыпалітычнае разьвіцьцё Рэспублікі Беларусі, неспрыяльная геапалітычная сітуацыя пакуль не дазволілі належна зьдзейсніцца ўсяму, пра што мы марылі чвэрць стагодзьдзя таму. У дзяржаве вядуць рэй тыя, хто топча свабоды, хто нішчыць падмурак незалежнасьці – нацыянальныя каштоўнасьці ды беларускую мову, хто цягне нашу краіну ў новаімпэрскія цянёты. Але ж мы маем сотні тысяч аднадумцаў, фронтаўцаў паводле сваіх перакананьняў. Мы ўпэўненыя, што ўсіх нас не пакіне абыякавымі 25-годзьдзе заснаваньня Беларускага Народнага Фронту – руху за незалежнасьць нашай Бацькаўшчыны і свабоду яе народу.
Заклікаем усіх грамадзян Беларусі, усіх беларусаў, якія падзяляюць фронтаўскія каштоўнасьці ды не зьбіраюцца мірыцца з таптаньнем або дыскрэдытацыяй фронтаўскіх ідэалаў, ушанаваць юбілей заснаваньня Беларускага Народнага Фронту “Адраджэньне”, вярнуць духоўнае і інтэлектуальнае лідэрства тым колам грамадзтва, якія адстойваюць незалежнасьць, свабоду і нацыянальна-культурнае Адраджэньне як непарыўныя ідэалы. Няхай у гэтай справе нас яднаюць спрадвечныя нашыя герб “Пагоня” і бел-чырвона-белы сьцяг.
Жыве Беларусь!
Рыгор Барадулін, Анатоль Варава, Вінцук Вячорка, Ніл Гілевіч, Анатоль Грыцкевіч, Павал Зьмітрук, Мікола Купава, Аляксей Марачкін, Алег Трусаў, Пётра Садоўскі, Алесь Суша, Генадзь Тумаш
—————————-
“Віншую сяброў Аргкамітэта БНФ “Адраджэньне” з надыходзячай датай 25-годдзя ўтварэння БНФ у кастрычніку гэтага года.Ухваляю зварот сяброў Аргкамітэта да грамадзянаў Беларусі з заклікам падтрымліваць ідэалы БНФ, дэклараваныя 25 гадоў таму, якія прывялі наш народ да дзяржаўнай незалежнасці Беларусі і перамогі над камунізмам. Далучаюся да зместу Звароту. Вітаю сяброў Аргкамітэта”.
Зянон Пазьняк , Варшава, 3 верасня 2013 г.

“Лічу, што адзначыць 25-я ўгодкі пасяджэння ў Чырвоным касцёле – гэта вельмі слушная задума. Зварот падтрымліваю”.
Алесь Бяляцкі , Бабруйск, выпраўленчая калонія № 2, 22 жніўня 2013 г.