запісаў: 1067, дакументаў: 12617

75 год «вялікага тэрора»

Дата публікацыі: 31 студзеня 2012

Да грамадзянаў Рэспублікі Беларусі, беларусаў усяго сьвету

Шаноўныя суайчыньнікі!

75 гадоў таму, у 1937 годзе, камуністычнае кіраўнцтва СССР пачало супраць народаў пад уладаю гэтае дзяржавы беспрэцэдэнтную кампанію ўзмацненьня тэрору, якую пазней назвалі «вялікім тэрорам». Яна прынесла пагібель сотням тысячаў, а пакуты і прыніжэньне мільёнам жыхароў Беларусі. Страшныя наступствы савецкага бальшавіцкага тэрору і сёньня адбіваюцца на нашым народзе. Незваротныя страты родных і блізкіх, зьнішчэньне генафонду нацыі, яе культурнага, навуковага і эканамічнага патэнцыялу.
Зьмяніліся пакаленьні, зрынутая ўлада бальшавікоў, але і сёньня ў нашай краіне робяцца спробы сьцерці памяць аб злачынствах савецкага рэжыму, апраўдаць іх, а злачынцаў – абяліць. Злавесныя тэндэнцыі “барацьбы з ворагамі народу» выяўляюцца ў тым, як дзейная ў Беларусі ўлада ставіцца да іншадумцаў, да змагароў за правы і свабоды.

Мы лічым недапушчальным і злачынным зьнішчэньне і фальсыфікацыю гістарычнай памяці. Мы ўпэўненыя, што яе захаваньне і адраджэньне дапаможа беларускаму народу пераадолець цяжкасьці, якія стаяць на яго гістарычным шляху, захаваць незалежнасьць нацыі, яе культурны і матэрыяльны здабытак, традыцыі ды каштоўнасьці. Неад’емнаю часткаю гістарычнае памяці беларусаў ёсьць памяць пра пакуты і ахвяраў бальшавіцкага таталітарнага тэрору.
Мы прапануем правесьці 2012 год як Год памяці ахвяраў таталітарызму ў Беларусі.
Мы зьвяртаемся да дзеячоў культуры й навукі, да палітыкаў і журналістаў, да грамадзкіх дзеячоў і пэдагогаў, да сьвятароў усіх канфэсіяў, да ўсяго народу Беларусі:
Аб’яднайма намаганьні для выратаваньня гістарычнай памяці нашага народу. Не забудзьма пра злачынствы бальшавіцкіх катаў. Дапаможам тым, хто памятае, ушанаваць памяць загінулых, дапаможам маладым ведаць праўду. Зробім усё, што ў нашай моцы, каб ня даць забыцца, падмяніць і абылгаць тое, што было. Успомнім забітых і закатаваных дзеля тых, якія жывуць цяпер, і дзеля будучых пакаленьняў.

Мы ініцыюем стварэньне Грамадзкага арганізацыйнага камітэту правядзеньня Году памяці ахвяраў таталітарызму ў Беларусі, захадаў дзеля ўшанаваньня памяці ахвяраў рэжыму, захаваньня гістарычнай памяці, выхаваньня маладога пакаленьня ў духу павагі да гісторыі й культуры сваёй нацыі.
Мы прапануем у 2012 годзе правесьці па ўсёй краіне акцыі памінаньня ахвяраў рэпрэсіяў таталітарнага рэжыму, прысьвяціць гэтай падзеі грамадзкія канфэрэнцыі, добраўпарадкаваць магілы й помнікі ў мясьцінах масавых зьнішчэньняў бязьвінных грамадзянаў, парупіцца, каб ніхто ня быў забыты.
Мы заклікаем беларускае грамадзтва выступіць супраць любых формаў тэрору, сярод якіх асабліва небясьпечным ёсьць тэрор дзяржавы супраць сваіх грамадзянаў. Злачынствы такого кшталту не павінны застацца непакаранымі й забытымі.

Уключайцеся ў працу Арганізацыйнага камітэту. Прыносьце й дасылайце свае прапановы. Удзельнічайце ў акцыях Году памяці ахвяраў таталітарызму ў Беларусі.

Ініцыятыўная група Грамадзкага арганізацыйнага камітэту

Зварот падпісалі:

 
І. Кузняцоў
В. Арэшка
Ю.Хадыка
У.Раманоўскі
М.Гаравы
Л.Андросік
В.Чарнаморцава
Г.Хваль
С. Ханжэнкаў
З.Тарасевіч
В.Івашкевіч
В.Бадун
В.Нямковіч
С.Вяргей
А.Багінская
А.Паўлоўская
А.Ахрамовіч
В.Анемпадыстаў
У.Маркевіч
Л.Стома
Л.Лунёва
І.Студзінская
С.Законьнікаў
А.Валахановіч
Л.Акаловіч
В.Вячорка