Мітынг, прысвечаны 50-ым угодкам Усеагульнай дэкларацыі правоў чалавека

6 сьнежня на Кастрычніцкай плошчы г. Мінска (насупраць рэзідэнцыі прэзідэнта РБ А.Лукашэнкі) адбыўся мітынг, прысьвечаны 50-ым угодкам Усеагульнай дэкларацыі правоў чалавека. Заяўляльнікамі акцыі былі намесьнік старшыні Беларускага Народнага Фронту «Адраджэньне» Юры Хадыка і старшыня Праваабрончага Цэнтру «Вясна-96» Алесь Бяляцкі. Заяўка на правядзеньне акцыі на Кастрычніцкай плошчы была пададзеная ў Мінскі гарвыканкам, але гарвыканкам адмовіў у правядзеньні мітынгу на Кастрычніцкай плошчы. Паколькі гарвыканкам ня меў матывацыі для сваёй адмовы, то вымушаны быў тэрмінова выдаць сьпецыяльную пастанову пра асаблівы статус Кастрычніцкай плошчы, паводле якога на ёй нельга праводзіць масавыя акцыі. Гэтая пастанова супярэчыць дзейснаму заканадаўству. Варта нагадаць, што 4 гады таму ўлады забаранілі апазіцыі праводзіць акцыі на плошчы Незалежнасьці, таксама надаўшы ёй асаблівы статус.