Біяграфія:

23 лютага вызвалены з-пад варты актывiст «Маладога Фронту» Аляксей Шыдлоўскi. 25 лютага ва Управе Беларускага народнага фронту «Адраджэньне» адбылася ягоная прэс-канферэнцыя. 24 лютага 1998 г. ён быў асуджаны на год i шэсьць месяцаў пазбаўленьня волi ў калонii ўзмоцненага рэжыму. Да суда Аляксей Шыдлоўскi шэсьць месяцаў правёў у мiнскiм сьледчым iзалятары. Такiм чынам, ён павiнен быў выйсьцi на волю 25 лютага. Менавiта на гэты дзень «Малады Фронт» планаваў сустрэчу свайго актывiста, але нечакана стала вядома, што Аляксей Шыдлоўскi ўключаны ў сьпiс амнiставаных. Такiм чынам, Аляксей Шыдлоўскi выйшаў на волю на два днi раней. Варта адзначыць, што паводле беларускiх законаў асоба, якую амнiставалi, на працягу 10 гадоў ня можа разьлiчваць на паўторную амнiстыю. Зранку 25 лютага сябры «Маладога Фронту» правялi каля мiнскай калонii ўзмоцненага рэжыму УЖ 15/1 пiкет супраць гвалтоўнага амнiставаньня. У пiкеце прымаў удзел i сам А. Шыдлоўскi.