Форма асуджанага да смяротнага пакарання

У 2014 годзе Вольга Грунова, маці расстралянага Аляксандра Грунова, атрымала па пошце турэмную робу сына і абутак, у якім ён знаходзіўся ў камеры смяротнікаў. Усё гэта было даслана пасылкай „Да запатрабавання”.

 Форма смяротніка складаецца з двух прадметаў – блакітна-шэрага колеру курткі і такіх самых нагавіц. На куртцы напісаныя белай фарбай няроўныя літары „ИМН” – выключная мера пакарання. Гэта другі вядомы факт, калі форма смяротніка (не асабістая рэч, а выдадзеная дзяржавай), дасылаецца сваякам. І ёсць пытанне: хто прыдумаў высылаць жудасныя пасылкі? З атрыманнем пасылкі Вольга Грунова зразумела, што прысуд у адносінах яе сына выкананы. Паводле арт. 175 Крымінальна-выканаўчага кодэкса Рэспублікі Беларусь, “Смяротнае пакаранне выконваецца непублічна шляхам расстрэлу. Цела для пахавання не выдаецца, аб месцы пахавання не паведамляецца”. Хутчэй за ўсё, перад тым, як выслаць, форму пралі и дызентфікавалі, але яна захоўвае пах турмы, пах смерці.