Масавыя пратэсты рабочых, красавік 1991 год, Мінск (частка 2).  Фота Уладзіміра Сапагова (1952- 2012). На фотаздымках адлюстраваны шлях з Трактарнага заводу на Плошчу Леніна.  На фотаздымках бачны бел-чырвона-белыя сцягі. Часта пратэсты красавіка 1991 года называюць чыста эканамічнымі, гэта не адпавядае рэальнасці. Менавіта падчас гэтых пратэстаў ставілася пытанне дэпартызацыі. Па словах удзельніка падзеяў Васіля Леўчанкава, “красавіцкія страйкі зламалі хрэбет КПСС”.    

 Лёс фатографа драматычны. Уладзімір Сапагоў  нарадзіўся ў Берасцейскай вобласці, выхоўваўся ў дзіцячым доме, вучыўся ў Маскве. Працаваў: на БАМе, на кінастудыі “Беларусьфільм”, на Трактарным заводзе. У 80-ыя гады ХХ-га стагоддзя далучыўся да Адраджэнскага руху. У 1998-2000 супрацоўнічаў з праваабарончым выданнем “Права на Волю”. Уладзімір Сапагоў  ніколі не развітваўся з фотаапаратам, жыў у інтэрнаце Трактарнага заводу, быў самотным чалавекам. У апошнія дні жыцця фатографа ў інтэрнаце рабілі рамонт, і адразу пасля смерці Уладзіміра Сапагова арыгіналы фотаздымкаў выкінулі на сметнік. Але яго сябар Міхаіл Мякіш здолеў уратаваць негатывы і пазітывы, якія аддала камэндантка інтэрнату. Уладзімір Сапагоў пахаваны сябрамі ў вёсцы Весніна Лагойскага раёну.