запісаў: 913, дакументаў: 11992

“Святы, якія абуджаюць нацыянальную свядомасць”- фотавыстава ў Оршы

Дата публікацыі: 08 ліпеня 2016

“Святы, якія абуджаюць нацыянальную свядомасць”, – так называецца фотавыстава, што адкрылася 5 ліпеня ў Оршы.

На чорна-белых фота прадстаўлена народнае свята Купалле, якое ў 1987 і 1991 гадах арганізоўвала моладзевая беларуская суполка “Талака”. Шчаслівыя твары, чароўнае вогнішча, разнатраўе беларускай прыроды ў самую верхавіну лета на першых жа фота адразу прыцягваюць увагу гледачоў,  акунаючы іх у рамантычную купальскую атмасферу, гармонію чалавека і прыроды, гармонію беларускай нацыянальнай культуры і самога жыцця. Уся экспазіцыя глядзіцца на адным дыханні і доўга не адпускае, пакідаючы пачуццё прасвятлення і судакранання да высокага і сакральнага.

На суседняй сценцы фотаздымкі дня памінання продкаў Дзяды ў Курапатах у 1989 годзе. Сярод удзельнікаў акцыі шмат вядомых асоб – Алесь Марачкін, Мая Кляшторная, Віктар Івашкевіч, Валеры Шчукін, Янка Брыль і іншыя. Яны і сотні іншых менш вядомых людзей прыйшлі ў гэтае страшнае месца, каб аддаць даніну памяці бязвінна загінулым продкам, бо забытая і неўсвядомленая трагедыя мае асаблівасць паўтарацца.

Выстава арганізавана Цэнтрам даследавання грамадзянскай супольнасці Беларусі. Усе здымкі выкананы беларускім фатографам Уладзімірам Сапаговым (1952-2012). Выстава дзенічае да канца ліпеня, адкрыта для ўсіх жадаючых па адрасе: вул. Чырвонаармейская, д. 13.

Паводле http://orsha.eu

04190014

Купалле 1987, музей Драўлянага дойлідства, Строчыцы