запісаў: 873, дакументаў: 11811

Грамадзкі творчы конкурс “КУРАПАТЫ – НАРОДНЫ МЭМАРЫЯЛ” пад дэвізам “Праз Курапаты – да пакаяньня”

Дата публікацыі: 05 верасня 2016

“Вытокі” пачынаюць публікацыю матэрыялаў па грамадзкім творчым конкурсе “КУРПАПАТЫ – НАРОДНЫ МЭМАРЫЯЛ”.

У далейшым, дадатковую інфармацыю па конкурсе можна будзе знайсьці ў разьдзеле сайта “Варштат”

Грамадзкі творчы конкурс
“КУРАПАТЫ – НАРОДНЫ МЭМАРЫЯЛ”
пад дэвізам “Праз Курапаты – да пакаяньня”

Адкрытыя для грамадзтва ў 1988 Курапаты сталі адным з галоўных сымбаляў трагічнай гісторыі Беларусі. Разам з тым Курапаты – гэта адначасова і сімвал генацыду беларускага народу, і эўрапейскі мэмарыял памяці ахвяраў сталінізму з розных краін, рознага паходжаньня, забітых на беларускай зямлі. Усьведамленьне велізарных стратаў, нанесеных беларускаму народу і народам Эўропы савецкім бальшавіцкім рэжымам, істотна паўплывала на сьвядомасьць беларусаў, падштурхнула працэс паўстаньня сувэрэннай нацыі і незалежнай дзяржавы Беларусь.

Але больш за чвэрць стагодзьдзя дзяржава ня робіць нічога для ўшанаваньня памяці ахвяраў савецкага тэрору, для мэмарыялізацыі Курапатаў ды іншых месцаў масавых забойстваў, зьдзейсьненых у Беларусі савецкімі карнымі органамі, а таксама адмаўляецца раскрываць праўду пра маштаб рэпрэсіяў і абнародаваць імёны ахвяраў. Гэта лягічна для цяперашняй ўлады, якая дэкляруе сваю пераемнасьць з уладай савецкай.

Курапаты шанавала і бараніла беларуская грамадзянская супольнасьць. Дзякуючы грамадзтву Курапаты былі афіцыйна прызнаныя помнікам, паўстаў Народны мэмарыял, тэрыторыя месца згубы збольшага не была парушаная. Грамадзтва патрабавала комплекснай мэмарыялізацыі Курапатаў, дзеля якой адбыўся творчы конкурс у 1993.

Натуральным працягам працы дзеля захаваньня і ўшанаваньня Курапатаў, адраджэньня гістарычнай памяці беларусаў будзе новы творчы конкурс. У задачы яго ўваходзіць ня толькі распрацоўка праектаў мэмарыяльных аб’ектаў на тэрыторыі помніка. Сёньня беларускае грамадзтва ня мае магчымасьцяў узяць на сябе такую працу, а разьлічваць на адэкватнае рашэньне гэтай задачы існай уладай немагчыма. З увагі на характар мясцовасьці, а таксама на тое, што ўжо шмат гадоў фактычна адбываецца ўзвядзенне Народнага мэмарыялу, ня могуць разглядацца маштабныя праекты мэмарыялізацыі, якія істотна зьмяняюць ляндшафт, характар і статус помніка.

Мы прапануем конкурс творчых ідэяў і працаў, выкананых у розных відах плястычных мастацтваў, а таксама ў іншых відах мастацтва – у музыцы, літаратуры, тэатры і кіно, якія ўвасобілі б такія тэмы, як Курапаты, памяць пра ахвяры, непрыняцьце гвалту і бальшавізму, пакаяньне за ўдзел людзей у злачынствах таталітарнага рэжыму, а таксама за тое, што мы маглі і можам зрабіць, але не зрабілі дзеля праўды, волі і годнага жыцця. Мастацкія формы ўвасабленьня тэмаў мусяць быць у гармоніі з духам існага Народнага мэмарыялу, а таксама не павінны навязваць пэўных ідэалягічных альбо рэлігійных канцэпцыяў.

Пры ацэнцы ідэяў і працаў, зьвязаных з асэнсаваньнем прасторы мэмарыялу, перавага будзе аддавацца праектам, якія інтэгруюць тэрыторыю гістарычна-культурнай каштоўнасьці, улічваюць візуальнае ўспрыманьне мэмарыялу звонку. Трэба зважаць таксама на вобразныя і інфармацыйныя магчымасьці ахоўнай зоны і зоны рэгуляванай забудовы вакол каштоўнасьці.

Вынікі конкурсу дапамогуць распрацоўваць будучыя дэталёвыя праекты мэмарыялу, прапануюць грамадзтву выразныя вобразы і сымбалі, неабходныя для аднаўленьня гістарычнай памяці. На думку арганізатараў, конкурс прыцягне ўвагу грамадзтва, паспрыяе пашырэньню гістарычных ведаў, узбудзіць творчую актыўнасьць розных пакаленьняў мастакоў, увогуле будзе карысным для кансалідацыі грамадзтва і для ўмацаваньня заснаванай на каштоўнасьцях свабоды і гуманізму ідэнтычнасьці сучаснай беларускай нацыі. Арганізатары спадзяюцца, што чарговыя туры конкурсу змогуць адбывацца і надалей, а лепшыя конкурсныя працы складуць частку фондаў і экспазіцыі будучага Музэю Курапатаў.

Усе ўдзельнікі будуць мець гарантыі апублікаваньня сваіх працаў, большасьць –магчымасьць удзелу ў выніковай выставе, а адбор найлепшых павінен праходзіць пры чынным удзеле грамадзтва. Увага прэсы, публічнасьць, падтрымка грамадзянскай супольнасьці – неад’емныя ўмовы конкурсу.

Грамадзянская ініцыятыва “Экспэрты ў абарону Курапатаў”
Cуполка “Пагоня” Беларускага саюзу мастакоў
Беларуская асацыяцыя журналістаў
Саюз беларускіх пісьменьнікаў
Асамблея няўрадавых дэмакратычных арганізацыяў Беларусі
Грамадзкае аб’яднаньне “Хрысьціянская злучнасьць “Курапаты”
Беларуская асацыяцыя ахвяраў палітычных рэпрэсіяў
Грамадзкае аб’яднаньне “Дыярыуш”
Грамадзкі электронны архіў “Вытокі”
Прафсаюз РЭП
Арт Cядзіба
Грамадзкае аб’яднаньне “Цэнтар Супольнасьць”
Праваабарончы цэнтар “Вясна”.

Умовы грамадзкага творчага конкурсу
“КУРАПАТЫ – НАРОДНЫ МЭМАРЫЯЛ”
пад дэвізам “Праз Курапаты – да пакаяньня”

МЭТЫ

  • Ушанаваньне памяці ахвяраў савецкага бальшавіцкага рэжыму ў Беларусі
  • Прыцягненьне ўвагі грамадзтва да тэмы рэпрэсіяў і пашырэньне гістарычных ведаў
  • Падтрымка творцаў, якія зьвяртаюцца да маральнай і гістарычнай тэматыкі
  • Распрацоўка прапановаў і канцэпцыяў разьвіцьця Народнага мэмарыялу ў Курапатах і мэмарыялаў у іншых месцах масавых бальшавіцкіх рэпрэсіяў у Беларусі

 

ТЭМЫ

  • Трагедыя беларускага народу і кожнага асобнага чалавека, які стаў ахвярай бальшавіцкай катавальнай сыстэмы
  • Гістарычная памяць і пакаяньне, неабходныя для плённага разьвіцьця нацыі
  • Народны мэмарыял як форма ўшанаваньня памяці ахвяраў бальшавізму

 

УДЗЕЛЬНІКІ КОНКУРСУ

  • Прымаць удзел можа кожны паўнагадовы грамадзянін Беларусі ці замежжа, які падасьць творчую працу адпаведна ўмовам Конкурсу
  • Колькасьць працаў, якія падаее кожны ўдзельнік, не абмяжоўваецца
  • Час, у які была створаная конкурсная праца, не абмяжоўваецца; дапускаюцца працы, якія ўдзельнічалі ў іншых конкурсах
  • Конкурсная праца можа быць вынікам калектыўнай творчасьці

 

ТЭРМІНЫ І ПАРАДАК ПРАВЯДЗЕНЬНЯ

  • Конкурс праводзіцца ў 3 этапы
  • Першы этап – з 15 траўня па 31 жніўня 2016. Удзельнікі Конкурсу рыхтуюць свае працы і дасылаюць неабходныя матэрыялы ў Журы.
  • Другі этап – з 1 верасьня па 15 кастрычніка 2016. Журы адбірае конкурсныя працы для дэманстрацыі на выніковай выставе. Адабраныя працы дастаўляюцца для экспазыцыі. Арганізатары Конкурсу рыхтуюць выніковую выставу. У асобных выпадках на ёй можа быць паказаная электронная вэрсія працы.
  • Трэці этап – з 16 кастрычніка па 30 лістапада 2016. Вынікі Конкурсу дэманструюцца ў рамках II дакумэнтальна-мастацкай выставы “Праўда пра Курапаты”. Падчас выставы Журы вызначае працы-пераможцы Конкурсу і адзначае іх ганаровымі ўзнагародамі
  • На ўсіх этапах арганізатары інфармуюць грамадзтва пра хаду правядзеньня Конкурсу і пададзеныя працы
  • Улічваючы важнасьць тэмы і неабходнасьць грунтоўнай працы для яе ўвасабленьня, арганізатары плянуюць правесьці наступны Конкурс у 2017.

 

УМОВЫ ЎДЗЕЛУ
Конкурс публічны – удзельнікі выступаюць пад сваімі імёнамі. Але пры жаданьні захаваць ананімнасьць удзельнік выступае пад псэўданімам і Журы не агалошвае ягоныя дадзеныя

На Конкурс прымаюцца творчыя працы ў галіне плястычных мастацтваў па наступных намінацыях:

  • архітэктурны праект;
  • архітэктурна-ляндшафтны праект;
  • скульптура;
  • жывапіс;
  • графіка;
  • арт-аб’ект;
  • фатаграфіка;
  • відэаінсталяцыя.

 

Таксама ў межах асобных намінацыяў прымаюцца працы ў любых жанрах такіх мастацтваў, як

  • літаратура;
  • музыка;
  • тэатар;
  • кіно.

 

На першы этап удзельнікі падаюць сваю працу ў электронным выглядзе на адрас kurapaty@bielarus.by. Таксама аўтар запаўняе Форму ўдзельніка Конкурсу, якая ўключае зьвесткі пра творцу (ці аўтараў калектыўнай працы).
На другім этапе ўдзельнікі дастаўляюць арганізатарам Конкурса працы, адабраныя Журы для выставы. У выпадку складанасьці дастаўкі ці экспанаваньня працы, яна можа, з дазволу Журы экспанавацца ў электронным выглядзе. Арганізатары фармуюць экспазіцыю выставы і рыхтуюць інфармацыйныя матэрыялы.
На трэцім этапе – падчас правядзеньня выставы – Журы вызначае пераможцаў Конкурсу і адзначае іх ганаровымі ўзнагародамі.

 

ПАДВЯДЗЕНЬНЕ ВЫНІКАЎ

  • Улічваючы магчымую разнастайнасьць відаў і жанраў працаў, плянуецца вызначыць некалькі лепшых твораў (гран-пры) па намінацыях Конкурсу.
  • Таксама будуць прысуджацца ганаровыя дыплёмы першай і другой ступені па намінацыях і дыплём глядацкіх сымпатыяў паводле апытаньня наведнікаў выставы і ў сеціве.
  • Усе працы, якія адпавядаюць умовам Конкурсу, публікуюцца на інтэрнэт-рэсурсе vytoki.net
  • Усе працы, якія ўдзельнічаюць у выставе, публікуюцца ў яе друкаваным каталёгу.

 

АРГАНІЗАТАРЫ І ЖУРЫ КОНКУРСУ

  • З арганізацый і ініцыятываў, што падтрымалі правядзеньне Конкурсу, фармуецца Аргкамітэт, які рыхтуе і праводзіць творчае спаборніцтва, выніковую выставу і адзначэньне пераможцаў, а таксама забясьпечвае інфармацыйную падтрымку Конкурсу.
  • Аргкамітэт на агульным паседжаньні зацьвярджае Журы Конкурсу, якое вызначае творы для выставы і найлепшыя працы. Сябры Журы ня могуць адначасова быць удзельнікамі Конкурсу.
  • На сайце Грамадзкага электроннага архіву “Вытокі” www.vytoki.net Аргкамітэт апублікуе умовы Конкурсу, матэрыялы з гісторыі і тапаграфіі Курапатаў, а таксама прапановы да канцэпцыі мэмарыялізацыі гэтай гістарычна-культурнай каштоўнасьці міжнароднага значэння.

 

КАНТАКТЫ

Сайт: http://www.vytoki.net

Эл. адрас: kurapaty@bielarus.by

Спасылкі на матэрыялы:

СПРАВА КУРАПАТАЎ: Ахоўныя зоны     

http://vytoki.net/?docs=00019344

ПАСТАНОВА АБ ЗАЦВЕРДЖАННІ АХОЎНЫХ ЗОНАЎ   

http://vytoki.net/content/pastanova-20151.pdf

В.Гліннік.  Курапаты. ГІСТОРЫКА-АРХІТЭКТУРНЫ АПОРНЫ ПЛАН. ПРАЕКТ ЗОНАЎ АХОВЫ

 

ПУБЛІКАЦЫІ ў прэсе

http://novychas.by/hramadstva/u_palacy_mastactvau_adkrylasia

http://novychas.by/hramadstva/konkurs_dzielia_destalinizacyi

http://novychas.info/poviaz/pryblizna-vyznaczana-ljasnaja-daroha-u-kurapatah

http://novychas.info/poviaz/pravedniki-i-vyradki-z-adnae-vjoski-ahvjary-i-kat

 

Грамадзкі творчы конкурс

“КУРАПАТЫ – НАРОДНЫ МЭМАРЫЯЛ”

пад дэвізам “Праз Курапаты – да пакаяньня”

 

Анкета ўдзельніка

 

Анкета абавязкова запаўняецца ў электронным выглядзе і дасылаецца на адрас kurapaty@bielarus.by. Працы без наяўнасьці анкеты не разглядаюцца Журы. Пасьля атрыманьня працы і анкеты Аргкамітэт для пацьверджаньня зьвязваецца з удзельнікам

 

 

 

1

Імя і прозьвішча (калі група — усе іудзельнікі, кіраўнік, кантактная асоба)

 

 

2

Краіна пражываньня ўдзельніка

 

 

3

Узрост удзельніка (удзельнікаў)

 

 

4

Каардынаты для кантактаў:

эл. адрас,

тэлефон,

паштовы адрас

 

4

Прафесія, род дзейнасьці

 

 

5

Псэўданім, (па жаданьні), назва групы

 

6

Ці згодны агалошваць сапраўднае імя?

 

7

Колькасьць працаў

 

 

8

Назва кожнай з працаў

 

 

9

Дата стварэньня кожнай з працаў

 

 

10

Намінацыя кожнай з працаў

 

 

11

Тэхніка выкананьня кожнай з працаў

 

 

12

Камэнтар ці тлумачэньне да кожнай з працаў

 

 

13

Дадатковая інфармацыя (магчымасьці прыезду ўдзельніка, перасылкі працы і да г.п.)

 

 

14

Дата запаўненьня анкеты