запісаў: 913, дакументаў: 11992

А МЯНЕ НАТХНЯЕ ВОЛЯ

Дата публікацыі: 20 кастрычніка 2014

18 кастрычніка на Паўночных могілках Мінска адбылося ўрачыстае адкрыццё помніка Віктару Івашкевічу.
Пад гукі дуды айцец Андрэй Абламейка асвяціў магілу і помнік аўтарства скульптара Ігара Засімовіча. Помнік вышынёй у рост Віктара ўяўляе сабой шчыт з шасьціканцовым беларускім крыжам, на крыжы – барэльеф, дзе Віктар Івашкевіч натхнёна глядзіць у неба, і бронзавая Пагоня. На помніку таксама адлітая ў мэтале цытата з верша Анатоля Сыса, прысвечанага Івашкевічу: “…А мяне натхняе Воля…”
Ушанаваць памяць сябра прыйшлі шматлікія аднадумцы: Алесь Суша, Вінцук Вячорка, Вацлаў Арэшка, Алесь Бяляцкі, Дыяна Мікульская, Генадзь Фядыніч, Алег Дашкевіч, Алесь Тамковіч, Славамір Адамовіч, Кася Камоцкая ды іншыя. У шчырых словах памяці Віктара людзі прыгадвалі яго як адкрытага, пазытыўнага і пры гэтым цьвёрдага і прынцыповага чалавека, для якога Свабода і Беларусь былі абсалютнымі каштоўнасцямі.