запісаў: 867, дакументаў: 11781

ЗАХАВАННЕ ПАМЯЦІ. Зварот да дэмакратычнай грамадскасці Беларусі

Дата публікацыі: 31 ліпеня 2013

Удзельнікі круглага стала, прысвечанага пытанням люстрацыі ў Беларусі, які адбыўся 29 ліпеня 2013, падтрымалі зварот гістарыкаў, архівістаў і краязнаўцаў , які заклікае берагчы і  публікаваць дакументы, датычныя гісторыі дэмакратычных арганізацый і грамадзянскай супольнасці Беларусі.

ЗВАРОТ ДА ДЭМАКРАТЫЧНАЙ ГРАМАДСКАСЦІ БЕЛАРУСІ

 Сёння, як і ў савецкія часы працягваецца фальшаванне гістарычнай праўды і маніпуляванне гісторыяй у інтарэсах кіруючага рэжыму. Праз праўладныя СМІ, афіцыйных “публіцыстаў” і “гісторыкаў” ствараецца несапраўдны малюнак грамадзскага і палітычнага жыцця ў апошнія два дзесяцігоддзі. Большасць матэрыялаў па найноўшай гісторыі нашай краіны, якія маюць дачыненні да грамадзянскай супольнасці і палітычнай апазіцыі не захоўваюцца ці не даступныя для даследчыкаў.

Беларусі пагражае ізноў апынуцца без уласнай гісторыі, бездапаможнаю перад рознымі маніпулятарамі мінуўшчныны і будучыні.

Мы упэўненыя, што захаванне дакументальнай спадчыны найноўшай гісторыі, найперш спадчыны дэмакратычных рухаў, грамадзянскай супольнасці, палітычных арганізацый надзвычай важнае для фармавання аб’ектыўнага погляду на сучасную гісторыю Беларусі, для стварэння праўдзівых нацыянальных гістарычных канцэпцый і для выхавання ўсіх пакаленняў беларускага грамадства. Таксама застаецца важным і захаванне дакументальнай спадчыны папярэдніх, савецкіх часоў. Гэта датычыцца ня толькі рэпрэсій ці супраціву, але ўсіх аспектаў функцыянавання грамадства.

Таму мы звяртаемся да ўсіх дэмакратычных грамадскіх і палітычных арганізацый Беларусі, да актывістаў, краязнаўцаў і аматараў гісторыі з заклікам збіраць і захоўваць дакументы найноўшай гісторыі. Але захаваць дакументы – толькі першы крок. Чым больш такіх сведчанняў гісторыі будзе адкрытымі для грамадства і навукоўцаў, тым менш шанцаў застанецца для фальсіфікатараў гісторыі. Гэтыя матэрыялы стануць даступнымі праз сайты і публікацыі тых, хто мэтаскіравана займаецца захаваннем нашай гістарычнай спадчыны.

Дапамагайце такім інстытуцыям і ініцыятывам, перадавайце для публікацыі матэрыялы ці іх копіі, падтрымлівайце даследванні, дзяліцеся ведамі і ўспамінамі. Захаваная памяць пра мінулае вернецца лепшай будучыняй.

 Беларусы! Захавайма нашую гістарычную памяць!